Poesia di Gianni Grohovaz

FORA DE CASA ME XE NATO UN FIO

Prima ch’ el mondo crolasse per la guera,
i Grohovaz nasseva in Valscurigne,
in Belveder, Cosàla o Monte Gua,
in Zità Vecia, a Pehlin oppur in Braida.
A Zàmet jera nato un mio cugin ...
del nono mio, la cuna xe a Drenova!
Emilio me xe nato in riva al mar,
su la Laguna però, el xe venezian!
Sti giorni invece, el tredici setembre,
un “Atulzo” coi oci del Quarnero
xe el fio che me xe nato, quà a Toronto,
lontan da Fiume e da Cosàla nostra,
dove che i Grohovaz de solito nasseva
prima ch’ el mondo crolasse per la guera ...
Tanti anni fa, el destin ga preparado
questa congiura; ma cossa ti vol far?
Fora de casa me xe nato un fio
che portarà per sempre el nome mio.
Sul volto le sembianze del Quarnero,
nel cor, ghe darò mi la nostra fiamma,
dell’anima se cura la sua mama,
e Fiume, per procura ghe ga dado,
la forza per combatter chichessia
non conosesse storia e geografia.
Guardelo sto muleto ne la cuna! ...
el xe la bela copia de su pare ...
che nol ga paxe in giro per la tera
finché nol torna a casa in Belveder.
Guardelo sto muleto quando el pianze
xe un pianto zito, quasi el xe un lamento.
Ma forse mi me sogno, sarà per le panuzze ...
Ma el pianto suo me fa pensar a Ti.
A Ti, Fiume dei Grohovaz de un tempo,
a Ti che ti ga un nuovo cittadin,
anche se nato lontan dal Molo Lungo,
el xe fiuman de marca, de zecchin!